لانكم غياظيييين شديد لذا قررت أن أغيظكم بهذه الرسالة المشتركة
أولاً : كل ما أفتح المنتدى وأقول يمكن الحلوين ديل مرسلين لي رسالة القى اخر رسالة كانت مني في رمضان الفاااااات ورمضان الجاي قرب يجي.
ثانيا لو أنتو مرطبيين ومرتاحين نحنا هنا ضاربانا سخانتين الأولى سخانة الجو ودي مقدور عليها بالمكيفات وقعاد الضللة أما الاخطر هي سخانة الجيب والتي تسببت فيها الحكومة وهي تعلن عن صرف رواتب الشهر السابق قبل أربعة أيام من عيد الفطر المبارك يعني يوم 18 والعيد كان يوم 22 وطبعاً الماهية التي ننتظرها ستكون يوم 30 أكتوبر الجاري يعني أكثر من 52 يوم حالنا واقف يعني لو واحدة ولدت كان مرقت وودوها البحر ولو واحدة راجلها مات كان قربت تطلع من الحبس.
عشان كده رسايلكم وونستكم على الأقل بتخفف علينا هذه السخانات شوية وبالمناسبة بقول ليكم نكتة حلوة:
قال وائل ولؤي مغتربين وابوهم مات وما لحقوا يلقوا ليهم حجز عشان يحصلوا الدفن المهم وصلوا بعد اربعة ايام من البكاء وقالوا لعمهم( يأ اونكل نحنا عاوزنك تمشي معانا المقابر عشان نزور دادي) عمهم قال ليهم انا كنت في إجازة من يوم الوفاة وبكرة عندى إجتماع انتو ما بتعرفوا المقابر؟ قالوا ليه بنعرفها يا أونكل بس ما عارفين قبر دادي وين .... رد عليهم عمهم قبر ابوكم واضح تمشوا بالجهة الشرقية تلقوا ليكم قبر فيهو علم يعني ضريح خلف القبر ده في خمسة قبور جديدة قبر ابوكم رقم 3 .
في الصباح وائل ولؤي لبسوا ملابسهم وإجتبصوا التقول ماشين بارتي ومشوا المقابر وعلى حسب الوصف مشوا الجهة الشرقية وفعلاً وجدوا القبر الفيهو العلم ومشوا خلفه ليجدوا خمسة قبور كرت كرتونة يعني جديدة لنج وكمان مرشوشة بموية من شدة جدتها المهم رأسهم ضرب وقعدوا يتغالطوا ده قبر دادي لا ده ما قبر دادي.
شافهم من بعيد واحد مسطول جاء سلم عليهم قال ليهم أنشاءالله خير شايفكم واقفين من قبيل في شنو؟
قالوا ليها جينا نفتش قبر ابونا عشان نديهوا الفاتحة لكن ما عرفناهو!!!
المسطول إتغاظ منهم شديد وبحرقة قال ليهو أنتو جايين تدوهوا الفاتحة ولا عاوزين تدوهوا مصاريف ما تكشحوا الفاتحة من بعيد وتطيروا
ثقيلة مش كدة
النكتة دي انا بهديها ليكم لانكم ثقييلين وعاملين فيها مغتربين ومشغوليين