تقليعات زواج الالفية الجديدة
اخي قدورة أولاً كل سنة وأنت طيب وربنا يعيده علينا وعليك وعلى الاسرة بالخير واليمن والبركات وإنشاءلله عيد الضحية تكون معانا ونأكل مع بعض الشية والمرارة والشطة بالدكوة وفي اليوم الثالث نأكل راس الخروف لأنو حا يكون أخر حاجة بس ما تجي وتعمل لي فيها ذي عبدالرحمن أخوي وتمسكني بعبارات الكنسترول والملح لاننا نحنا هنا في السودان شايتين ضفاري كل التسمعوا انو فلان كان كويس إتعشى وفي الصباح لقوه ميت.
في المرة السابقة حدثتك عن زواج أسامة محمد بلولة وإنو الراجل مسك المايكرفون وقعد يغني لعروسته في تقليعة جديدة وأمس كان زواج عاصم محمد مصطفى سعد أمبارح كانت الحنة وقبل المغرب ركبوا العريس حصان وسيروه للبحر تخيل منظر عاصم راكب الحصان وقاطع شارع الموردة وناس الحلة كلهم معاهم وقفوا ليهو الحركة واحدين يسبوا وواحدين بتوعين شمار عاجباهم الفكرة وعاصم عامل فيها ذي الامريكان بتوعين أفلام كابويات البقر طبعاً البقر والله ممكن تقول ذي السواري بس على حلو شوية غايتو كانت جدعة حلوة وتستاهل توثيق وارسالها ليكم لكن كان الخواجات زعلوا وعملوها موضوع خاصة في امر الرفق بالحيوان وكدة لانوالحصان شكلو كان مرهق شوية ذي التقول كان مساهر في حفلة
بلغ تحياتي للأخت النشيطة الدكتورة نبراس ولكل الأهل والأصدقاء سواء بالمنتدى وما تحرمنا من رسايلك يا حلو
أخوك حمودي