بعد السلام
تعالوا نتكلم شويه عن الزيط الطالع اليومين دى عن الدهب والغنى السريع واننا لو اشترينه جهاز حا نغنى فى فد يوم و(ننسى الارزاق بيد الله ) والله يا اخوانه انا شايف مهنة التنقيب عن الدهب دى مهنه متعبه وشاقه للغايه وحتى لو كان معاك جهاز انت برضو تعبان وتعب يمكن 90% بلا عوض ومن زمان نحن نسمع والله واحد فى الحته الفلانيه لقا كيلو وباعو بى مليار وفرتكان كان ماشى بى الجيه ديك ولقا 7 كيلو وعمل مصنع لكن يوم واحد من الجماعه المنعرفهم ما لقينه واحد حالتو اتغيرت يمشو زى ماهن ويجو اقل من الحاله المشو بيها وفى النهايه يجو يطلعو الدعايه لى الاجهزه : والله الزول العندو جهاز يغنى فى يومو والناس الراسن خفيف كتار وفى الباع الغنيمات وفى الباع الحافله الوحيده الملقطه الصاريف واشترى الجهاز ولكن الله ما اداهو ورجع قالو ليه الجهاز ده النوع الكعب وقام باع نص البيت واشترى واحد امريكى بس برضو الحال فى حالو ويا عالم اسى اخبارو شنى والله يستر عل ى الباقين .
طبعا الرزاق بيد الله والله رايدلو لقمه عيش فى العبيديه بياكلها والله رايد ليه الغنى قبلو فى بكانو القاعد فيهو وشغال بيغنى لكن البشتنه وعوجان وطلقان المشهاد لى حاجه زى دى ما فى ليه داعى بس معلبش زول التسددت عليه من جميع الجهات وعندو قدرة الحفر ده انا بقول ليه امشى طوالى العبيديه واحفر وربنا يرزقك
وفى النهايه يا اخوانه انا قايتو يقا لى شغلة الدهب دى زى المسابقات الفى الفضائيات ديك تلقى الواحد يكمل رصيدو وما يلقى اى حاجه والمستفيده جهات معينه اها دى نفس الحكايه نمشى العبيديه ويستفيدو ناس الكفتريات والمطاعم والمواصلات والناس النشترى منهم الاجهزه ...دحين اعكلو حسابكم وارضو ا بى واقعكم وارضو بى القسمه الله قسمها ليكم كان فى شندى كان الخرطوم كا فى كندا
وابقو واصلو
8 Dec 2008 - 15:28
